హసన్ తిలకరత్నె
1967, జూలై 14న కొలంబోలో జన్మించిన హసన్ తిలకరత్నె (Hashan Prasantha Tillakaratne) శ్రీలంకకు చెందిన క్రికెట్ క్రీడాకారుడు. పాఠశాలలో ఉన్నప్పుడే 1986లో ఇంగ్లాండు బి జట్టుపై గాలెలో ఆడటానికి ఎన్నికైనాడు. ఆ మ్యాచ్‌లో సెంచరీ సాధించి మ్యాచ్‌ను రక్షించాడు. అదే సంవత్సరం నవంబర్లో తొలి వన్డే మ్యాచ్‌ను ఆడినాడు. 1989 డిసెంబర్ నాటికి వికెట్‌కీపర్-బ్యాట్స్‌మెన్‌గా ఎదిగాడు. 1992 డిసెంబర్ తరువాత పత్యేక బ్యాట్స్‌మెన్‌గా అవతరించాడు.
1999 ప్రపంచ కప్ క్రికెట్ తరువాత శ్రీలంక టెస్టు, వన్డే జట్టులనుంచి తొలిగించబడ్డాడు. ఆ సమయములో దేశవాళీ క్రికెట్‌లో రాణించి మళ్ళీ 2001లో శ్రీలంక క్రికెట్ జట్టులో స్థానం సంపాదించాడు. 2002-03లో వన్డే పోటీలలో కూడా స్థానం పొందినాడు. 2003 ఏప్రిల్లో శ్రీలంక జట్టుకు నాయకత్వ హోదా కూడా పొందినాడు. కాని కాని నేతృత్వం వహించిన పదింటిలో కేవలం ఒకే ఒక్క మ్యాచ్ నెగ్గినాడు. ఆస్ట్రేలియాపై 3-0 తో ఓడిన తరువాత 2004 మార్చిలో నాయకత్వానికి రాజీనామా చేశాడు. ప్రయత్నాలు చేసిననూ ఆ తరువాత మళ్ళీ జాతీయ జట్టుకు ఎంపిక కాలేడు.
2005 ఫిబ్రవరి 1న శ్రీలంక క్రికెట్ బోర్డు తిలకరత్నెను 2004 డిసెంబరులో సంభవించిన సునామీ బాధితుల సహాయంకై ఏర్పాటుచేసిన "క్రికెట్ నిధి" కార్యనిర్వాహక డైరెక్టర్‌గా నియమించింది.[1] ఆరోపణలు రావడంతో మధ్యలోనే సస్పెండ్ కావలసివచ్చింది.[2]
టెస్ట్ క్రికెట్ గణాంకాలు మార్చు
తిలకరత్నె 83 టెస్టులు ఆడి 42.87 సగటుతో 4545 పరుగులు సాధించాడు. అందులో 11 సెంచరీలు, 20 అర్థసెంచరీలు ఉన్నాయి. టెస్ట్ క్రికెట్‌లో అతని అత్యధిక స్కోరు 204 (నాటౌట్).
వన్డే క్రికెట్ గణాంకాలు మార్చు
హసన్ తిలకరత్నె 200 వన్డేలలో జట్టుకు ప్రాతినిధ్యం వహించి 29.60 సగటుతో 3789 పరుగులు చేశాడు. అందులో 2 సెంచరీలు, 13 అర్థసెంచరీలు ఉన్నాయి. వన్డేలలో అతడి అత్యధిక స్కోరు 104 పరుగులు. బౌలింగ్‌లో 6 వికెట్లను కూడా సాధించాడు.
ప్రపంచ కప్ క్రికెట్ మార్చు
తిలకరత్నె తొలిసారిగా అరవింద డి సిల్వ నేతృత్వంలో 1992 ప్రపంచ కప్ క్రికెట్‌లో పోల్గొన్నాడు. ఆ తరువాత అర్జున రణతుంగ నేతృత్వంలో శ్రీలంక చాంపియన్ అయిన 1996 ప్రపంచ కప్‌లో కూడా పాల్గొన్నాడు. 1999, 2003 ప్రపంచ కప్ క్రికెట్‌లో కూడా జట్టుకు ప్రాతినిధ్యం వహించాడు.