మేరీ ఇంపీ
మేరీ, లేడీ ఇంపీ (వివాహానికి ముందు మేరీ రీడ్) (2 మార్చి 1749-20 ఫిబ్రవరి 1818) ఆంగ్ల సహజ చరిత్రకారిణి, బెంగాల్ కళల పోషకురాలు. బెంగాల్ ప్రధాన న్యాయమూర్తి సర్ ఎలైజా ఇంపీ భార్య అయిన ఈమె, కలకత్తాలో ఒక జంతు ప్రదర్శనశాలను స్థాపించి, వివిధ జీవులను చిత్రించడానికి భారతీయ కళాకారులను నియమించింది. ఆమె చిత్రాలు తరువాత ఇంగ్లాండుకు తీసుకెళ్లి జాన్ లేథమ్ చేత పరిశీలించబడ్డాయి. జాన్ లేథమ్ తాను వ్రాసిన జనరల్ సినోప్సిస్ ఆఫ్ బర్డ్స్ (1787) అనే పుస్తకపు అనుబంధంలో ఈ సేకరణలోని చిత్రాల పరిశీలన ఆధారంగా అనేక కొత్త జాతులకు పేర్లు పెట్టాడు.
.jpg)
జీవితచరిత్ర
మార్చుఆక్స్ఫర్డ్షైర్లో జన్మించిన మేరీ రీడ్, షిప్టన్ కోర్టుకు చెందిన 5వ బారోనెట్ సర్ జాన్ రీడ్, ఆయన భార్య హ్యారియెట్ యొక్క ముగ్గురు పిల్లలలో పెద్దది. జనవరి 18,1768న, లండన్ వెలుపల ఉన్న హామ్మర్‌స్మిత్ పారిష్ చర్చిలో (ఫుల్హామ్ ఉత్తర భాగం), ఆమె ముప్పై ఆరు సంవత్సరాల న్యాయవాది ఎలైజా ఇంపీను వివాహం చేసుకుంది. ఆ తరువాతి ఐదు సంవత్సరాలలో, వీరికి నలుగురు పిల్లలు జన్మించారు. ఎలైజా ఇంపీ యొక్క మునుపటి సంబంధం నుండి మరో ఇద్దరు పిల్లలు ఉన్నారు. ఈ చట్టవిరుద్ధమైన పిల్లలను మేరీ అంగీకరించింది. ఈ కుటుంబం 1773 వరకు ఈ ప్రాంతంలోని ఎసెక్స్ వీధిలో నివసించింది.
1773లో ఎలైజా ఇంపీ బెంగాల్లోని ఫోర్ట్ విలియంకు ప్రధాన న్యాయమూర్తిగా నియమించబడ్డాడు. ఈ దంపతులు తమ పిల్లలను హామ్మర్‌స్మిత్‌లోని తమ తండ్రి సోదరుడితో వదిలి భారతదేశానికి వెళ్లారు. 1775లో, ఫోర్ట్ విలియంలో స్థిరపడిన ఇంపీ, బరియింగ్ గ్రౌండ్ రోడ్ (ఇప్పుడు పార్క్ స్ట్రీట్) లో ఉన్న ఎస్టేట్ యొక్క విస్తృతమైన తోటలలో స్థానిక పక్షులు, జంతువుల సేకరణను ప్రారంభించాడు. ఈ ఎస్టేటు అంతకుముందు, 1760 నుండి 1764 వరకు బెంగాల్ గవర్నర్ అయిన హెన్రీ వాన్సిట్టార్ట్ కు చెందినది.
భారతదేశంలో చిత్రలేఖనాలు
మార్చు
1777లో ప్రారంభించి, ఇంపీ దంపతులు, పక్షులు, జంతువులు, స్థానిక మొక్కలను చిత్రించడానికి స్థానిక కళాకారులను నియమించారు. ఈ చిత్రాలు సాధ్యమైనంతవరకు జీవిత పరిమాణంలో, సహజ పరిసరాలలో చిత్రించబడ్డాయి. రెండు వందలకు పైగా ఉన్న ఈ చిత్రాలు డబుల్ ఫోలియోలతో తయారు చేయబడ్డాయి . తరచుగా ఇంపీ ఆల్బమ్ అని పిలువబడే ఈ సేకరణ, కంపెనీ శైలి చిత్రకళకు ఒక ముఖ్యమైన ఉదాహరణ.[3] ఈ చిత్రాలు గీసిన కళాకారుల్లో, ముగ్గురు కళాకారులు షేక్ జైనులద్దీన్, భవానీ దాస్, రామ్ దాస్ గా గుర్తించబడ్డారు.[4] ఈ ముగ్గురు గుర్తించబడిన కళాకారులు పాట్నాకు చెందినవారు. వారు గతంలో నవాబ్ కాసిమ్ అలీ వద్ద పనిచేసి ఉండవచ్చు. పెయింటింగ్స్ యొక్క ఖచ్చితత్వాన్ని బట్టి, లేడీ ఇంపీ కళాకారులకు మార్గనిర్దేశం చేయడంలో పాల్గొన్నట్లు తెలుస్తుంది. 300కు పైగా చిత్రాలలో సగానికి పైగా చిత్రాలు పక్షులవే.[4] సర్ ఎలైజా కూడా ముఖ్యంగా ముర్షీదాబాద్ నుండి వ్రాతప్రతులు, చిత్రాలను సేకరించాడు. తన సేకరణలపై ఆయన వ్యక్తిగత పర్షియన్ ముద్రను ముద్రించాడు. ఈయన భార్య చేసిన సేకరణలలో, పక్షుల పేర్లు పర్షియన్లో, కొన్నిసార్లు ఆంగ్లంలో, కళాకారుడి పేరు, తేదీతో పాటు ముద్రించబడింది. సుమారు 120 చిత్రాలు "లేడీ ఇంపీ సేకరణలో" ఉన్నట్లు గుర్తించబడ్డాయి, వీటిలో 100 పక్షులు ఉన్నాయి. ఈ సేకరణ 1810లో వేలంలో వివిధ వ్యక్తుల, సంస్థల చేతుల్లోకి వెళ్లింది.[4] కొన్ని చిత్రాలు లిన్నియన్ సొసైటీ ఆఫ్ లండన్‌కు 1856లో ఈమె కోడలు సారా ఇంపీ చేత సమర్పించబడ్డాయి. ఇందులో 47 పక్షులు, 8 క్షీరదాలూ, 8 మొక్కలూ ఉన్నాయి. ఒకటి లార్డ్ రాత్స్‌ఛైల్డ్చే ఫ్రేము కట్టించబడి, ఇప్పుడు ట్రింగ్‌లో ఉంది. చాలా చిత్రాల ఆచూకీ దొరకలేదు. లేథమ్ తన జనరల్ సినోప్సిస్ ఆఫ్ బర్డ్స్ యొక్క ఒకటవ, రెండవ సప్లిమెంట్స్ లో కనీసం 25 పక్షులను ప్రస్తావించాడు. కానీ వాటిలో 1785 కి ముందు గీసిన చిత్రాలలలో దేనినీ ప్రస్తావించలేదు.
కుటుంబం
మార్చు
1775 నుండి 1783ల మధ్య, ఇంపీ మరో నలుగురు పిల్లలను కన్నది. 1783లో ఆమె భర్తపై అభిశంసన జరిగి, ఇంగ్లాండుకు తిరిగి వెళ్లేటప్పటికి, వీరిలో ముగ్గురు మాత్రమే జీవించి ఉండి, ఆమె వారితో కలిసి ఇంగ్లాండుకు తిరిగి వచ్చింది. వారు 1784 జూన్లో ఇంగ్లాండుకు తిరిగి వచ్చారు. ఆమె ఇంగ్లాండుకు తిరిగి వచ్చిన తర్వాత మరో బిడ్డకు జన్మనిచ్చింది. వారు మొదట గ్రోస్వెనర్ వీధిలో నివసించారు. ఆ తర్వాత వింపోల్ వీధికి, చివరగా ఈస్ట్ సస్సెక్స్‌లో, లెవెస్ సమీపంలోని న్యూవిక్ పార్కుకు మారారు. 1801 నుండి 1803 వరకు వీరు పారిస్లో నివసించారు. ఆమె భర్త 1809లో మరణించాడు. ఈమె 1818లో మరణించింది. వీరిద్దరినీ లండన్, హామ్మర్‌స్మిత్ లోని సెయింట్ పాల్స్ చర్చి వద్ద ఉన్న కుటుంబ స్మశానవాటికలో ఖననం చేశారు. చర్చిలోని గోడపై పీటర్ రౌ చేత ప్రతిష్టించిన స్మారక చిహ్నంతో వీరిని స్మరించుకుంటారు.
హిమాలయన్ మోనాల్ (లోఫోఫోరస్ ఇంపేజానస్) కు ఆమె గౌరవార్థంగా 'ఇంపియన్ ఫెసెంట్' అని పేరు పెట్టారు. థామస్ గెయిన్స్‌బరో రూపొందించిన ఆమె వర్ణచిత్రం 1904లో క్రిస్టీస్ వేలంలో 2,800 గినియాలకు (2,940 పౌండ్లు) అమ్మబడింది.[5] ఆ చిత్రం ఇప్పుడు ఫర్మెన్ విశ్వవిద్యాలయంలో ఉంది.
మూలాలు
మార్చు- ↑ Latham, J. (1790). Index ornithologicus, sive, Systema ornithologiae. Volume 1. p. 350.
- ↑ Latham, John (1787). Supplement to the General synopsis of birds. p. 145.
- ↑ "The forgotten Indian artists of British India". BBC News. 30 November 2019. Retrieved 30 November 2019.
- ↑ 4.0 4.1 4.2 Ekhtiar, Maryam D., ed. (2011). Masterpieces from the Department of Islamic Art in The Metropolitan Museum. New York: Metropolitan Museum of Art. p. 401. ISBN 978-1-58839-434-7.
- ↑ "Prices for old masters". Edinburgh Evening News. 9 May 1904. p. 2 – via British Newspaper Archive.
సూచనలు
మార్చు- Cannon-Brookes, Caroline (24 February 2013). "Review of 'Lady Impey's Indian Bird Paintings'". British Society for Eighteenth-Century Studies. Retrieved 23 November 2016.
- Impey, Ethel Jane Adair (1963). About the Impeys. Worcester, England: Ebenezer Baylis. OCLC 561554858.
బయటి లింకులు
మార్చు- ఆక్స్‌ఫర్డ్ లోని అష్మోలియన్ మ్యూజియంలో "లేడీ ఇంపీస్ ఇండియన్ బర్డ్ పెయింటింగ్స్" ప్రదర్శన (14 ఏప్రిల్ 2013 వరకు)
- Impey, Elijah Barwell (1846). Memoirs of Sir Elijah Impey, Knt., First Chief Justice of the Supreme Court of Judicature, at Fort William, Bengal; with Anecdotes of Warren Hastings, Sir Philip Francis, Nathaniel Brassey Halhed, Esq., and Other Contemporaries; Compiled from Authentic Documents, in Refutation of the Calumnies of the Right Hon. Thomas Babington Macaulay. Simpkin, Marshall, and Co. ఇది మెకాలే, వారెన్ హేస్టింగ్స్ పై వ్రాసిన వ్యాసాలలో ఇంపీ పై జరిగిన దుష్ప్రచారానికి వ్రాతపూర్వక సమాధానంగా, ఇంపీ కుమారుడు వ్రాసిన ఎలైజా ఇంపీ జీవిత చరిత్ర.