వికీపీడియా:వాడుకరులకు సూచనలు/కాలదోషం పట్టే వ్యాసాలను గుర్తించడం ఎలా
కాలదోషం పట్టే వ్యాసాలను గుర్తించడం ఎలా
మార్చువికీపీడియా వ్యాసాల్లో చేర్చే సమాచారానికి కాలదోషం పట్టడమనేది పెద్ద సమస్య. చాలా పేజీల్లో సమాచారానికి కాలదోషం పడుతూ ఉంటుంది. కాలదోషం గురించి, సదరు పేజీల విషయంలో వాడుకరులు తీసుకోవాల్సిన చర్యల గురించీ ఈ భాగం తెలియజేస్తుంది. సమాచారానికి కాలదోషం పట్టినా తాజాకరించక పోతే, వాక్యాల్లో దోషం ఏర్పడుతుంది. (అలా ఏర్పడగల దోషాలను నివారించడం ఎలాగో తెలుసుకునేందుకు ఇదే పేజీ లోని కాలదోషం పట్టినా వాక్యదోషం ఏర్పడకుండా రాయడం చూడండి.)
ఇప్పటికే కాలదోషం పట్టేసిన పేజీలు
మార్చువ్యాసం లోని సమచారానికి ఈసరికే కాలదోషం పట్టేసి ఉండొచ్చు. అది ఒక వాక్యం కావచ్చు, కొన్ని వాక్యాలు కావచ్చు, ఒక విభాగంలో ఉండొచ్చు, అనేక విభాగాల్లో ఉండొచ్చు. ఉదాహరణలు:
- ఫలానా గ్రామంలోని దేవాలయంలో 2017 మే 18 న విగ్రహ ప్రతిష్ఠ జరగనుంది
- 2020 జూన్ 11 న ఎన్నికలు మొదలై, 2020 జూన్ 23 న పూర్తౌతాయి. ఫలితాలను 2020 జూన్ 27 న వెల్లడిస్తారు.
- ఒలింపిక్ క్రీడలు 2016 జూన్ 4 న మొదలౌతాయి
- ఆస్ట్రేలియా భారత్‌ల మధ్య క్రికెట్ మ్యాచి 2017 డిసెంబరు 26 న మొదలు కానుంది
పై వాక్యాల్లో సూచించిన తేదీ తరువాత ఆ పేజిలను చూసినపుడు కింది పద్ధతుల్లో ఏదో ఒకదాని ప్రకారం చర్య తీసుకోవాలి:
- ఆ వాక్యాల స్థానే తాజా సమాచారాన్ని చేర్చాలి. ఇది అత్యుత్తమ పద్ధతి
- తాజా సమాచారం గురించి తెలియనపుడు, ఆ పేజీలో పైన {{Update}} అనే మూసను చేర్చాలి. దానితో ఈ పేజీ వర్గం:తాజాకరించవలసిన వ్యాసాలు అనే వర్గం లోకి చేరుతుంది. ఆ వర్గాన్ని గమనించే వాడుకరులు ఆయా పేజీలను తాజాకరిస్తారు.
భవిష్యత్తులో ఖచ్చితంగా ఫలానా రోజు నాటికి కాలదోషం పట్టే పేజీలు
మార్చుప్రస్తుతం పేజీలో ఉన్న సమాచారం దోషరహితమే, కానీ భవిష్యత్తులో ఖచ్చితంగా ఫలానా తేదీ నాటికి దానికి కాలదోషం పడుతుంది. ఉదాహరణకు
- ఈ సినిమా 2020 ఏప్రిల్ 4 న విడుదల కానుంది
ఈ వాక్యంలో చూపించిన తేదీని దాటగానే ఈ వాక్యానికి కాలదోషం పడుతుంది. అప్పటి వరకు ఈ వాక్యం దోష రహితమే. కానీ ఈ వాక్యాన్ని సవరించాలని ఆ తేదీన గుర్తు రాకపోవచ్చు. అందుచేత ఈ వాక్యం పక్కనే {{Update after}} అనే మూసను చేర్చాలి (సంవత్సరం, నెల, తేదీ పరామితులను తప్పనిసరిగా చేర్చాలి). ఆ తేదీ వచ్చే వరకు మూస అదృశ్యంగా ఉంటుంది, స్తబ్దు గానే ఉండిపోతుంది. ఆ తేదీ దాటగానే మూస ప్రత్యక్షమై, పేజీని వర్గం:కాలదోషం పట్టిన వాక్యాలు గల వ్యాసాలు అనే వర్గం లోకి చేరుస్తుంది. ఆ వర్గాన్ని గమనించే వాడుకరులు ఆ పేజీని తాజాకరిస్తారు. ఉదాహరణకు {{Update after|2023|03|30}} అని రాస్తే 2023 మార్చి 30 తరువాత ఈ మూస క్రియాశీలమై, పేజీలో [dated info] అనే మూస కనిపిస్తుంది, అలాగే ఆ పేజీని పైన చూపిన వర్గం లోకి చేరుస్తుంది. సంవత్సరం, నెల, తేదీ పరామితులు ఇవ్వకపోతే, ఈ మూస వెనువెంటనే క్రియాశీలమౌతుంది.
భవిష్యత్తులో కాలదోషం పట్టే సంభావ్యత ఉన్న పేజీలు
మార్చుప్రస్తుతం సమాచారం దోషరహితమే, కానీ భవిష్యత్తులో దానికి కాలదోషం పట్టవచ్చు. కానీ ఎప్పుడు పడుతుందో తెలియదు. ఉదాహరణకు:
- స్థూల దేశీయోత్పత్తి పరంగా 2020 సెప్టెంబరు 19 నాటికి భారతదేశం ప్రపంచంలో ఆరవ స్థానంలో ఉంది.
ఆ తరువాత భారతదేశం ఒక స్థానం ఎగబాక వచ్చు. అలాంటి సందర్భంలో దాన్ని తాజాకరించే విషయాన్ని గమనింపులో ఉంచుకునేందుకు {{As of}} అనే మూసను వాడాలి, ఇలా:
స్థూల దేశీయోత్పత్తి పరంగా {{As of|2020|09|19}} భారతదేశం ప్రపంచంలో ఆరవ స్థానంలో ఉంది.
అపుడు ఆ వాక్యం కింది విధంగా కనిపిస్తుంది.
- స్థూల దేశీయోత్పత్తి పరంగా As of 19 సెప్టెంబరు 2020[update]భారతదేశం ప్రపంచంలో ఆరవ స్థానంలో ఉంది.
వాక్య రూపం మారలేదు. కానీ ఈ రెండో వాక్యం వర్గం:కాలదోషం పట్టే అవకాశమున్న వాక్యాలు గల వ్యాసాలు అనే వర్గం లోకి చేరుతుంది. ఈ వర్గాన్ని గమనించే వాడుకరులు ఆ పేజీలో తగు చర్య తీసుకునే అవకాశం ఉంటుంది.