ఓహో పావురమా

ఓహో పావురమా! 1945 నాటి స్వర్గసీమ సినిమాలోని పాట. ఈ పాటను బాలాంత్రపు రజనీకాంత రావు రాసి, స్వరపరిచాడు. భానుమతి ఆలపించి, అభినయించింది. కథానాయకుడిని కవ్వించే సందర్బంలోని ఈ పాట ఆనాటి ప్రేక్షకుల్లో సంచలనం సృష్టించడమే కాదు సుదీర్ఘ కాలం క్లాసిక్‌గా నిలిచింది. సంగీతపరంగానూ, భానుమతి గానం వల్ల పాట చిరకాలం ప్రేక్షకాభిమానం చూరగొంది.

"ఓహో పావురమా"
రచయిత	బాలాంత్రపు రజనీకాంతరావు
సంగీతం	బాలాంత్రపు రజనీకాంతరావు
సాహిత్యం	బాలాంత్రపు రజనీకాంతరావు
ప్రచురణ	1945
రచింపబడిన ప్రాంతం	ఆంధ్ర ప్రదేశ్
భాష	తెలుగు
రూపం	భావగీతం
గాయకుడు/గాయని	భానుమతీ రామకృష్ణ
రికార్డు చేసినవారు (స్టుడియో)	వాహినీ స్టుడియోస్
చిత్రంలో ప్రదర్శించినవారు	భానుమతీ రామకృష్ణ

పాట

ఓ ఒహోహో ఒహోహో ఒహోహో హోహోహో
పావురమా
వెరపేలే, పావురమా!

తరుణ యౌవనము పొంగి పొరలు
నా వలపు కౌగిలిని ఓలలాడ రావే

తనకు తానై వలచి పిలిచే
తన్వి మోహమని చుల్కన సేయకుమా.

సందర్భం, చిత్రీకరణ

స్వర్గసీమ సినిమాలో భానుమతి

స్వర్గసీమ సినిమాలో భానుమతి నెగెటివ్ ఛాయలున్న వ్యాంప్ పాత్ర పోషించింది. ఈ పాత్ర ఏదో రాసుకుంటూన్న నాయకుడిని కవ్వించే సందర్భంలో ఓహో పావురమా పాట వస్తుంది. ఆనాటి సంప్రదాయ ధోరణులకు విరుద్ధంగా ఈ పాటలో భానుమతి స్లీవ్‌లెస్ జాకెట్ వేసుకుని, కవ్విస్తూ చేసిన నటన ప్రేక్షకుల్లో సంచలనం సృష్టించింది.

స్వరకల్పన, గానం

స్వర్గసీమ సినిమాకి చిత్ర కథానాయకుడు, సంగీత దర్శకుడు చిత్తూరు నాగయ్య. కానీ దర్శకుడు బి. ఎన్. రెడ్డి ఈ పాటను బాలాంత్రపు రజనీకాంత రావుతో రాయించి, అతనితోనే స్వరకల్పన చేయించాడు. ఆనాటికి ప్లేబాక్ పద్ధతి ఇంకా అమలులోకి రాలేదు. నటులు సాధారణంగా గాయకులు అయివుండేవారు. అలా ఈ పాటను నటించిన భానుమతి ఆలపించింది.

ప్రాచుర్యం

ఓహోహో పావురమా పాట చాలా ప్రజాదరణ పొందింది. సినిమా విడుదలైన ఎన్నో దశాబ్దాల తర్వాత కూడా ఈ పాట క్లాసిక్‌గా పేరుతెచ్చుకుని నిలబడింది. అయితే ఇది క్లాసిక్‌గా నిలవడానికి కారణం బాలాంత్రపు రజనీకాంతరావు అందించిన "రమ్యమైన బాణీ", భానుమతి గానం తప్ప "సాహిత్యపరంగా చెప్పుకోదగ్గ గొప్పదనం లేదు" అని తెలుగు సినీగేయకవుల చరిత్ర కర్త డాక్టర్ పైడిపాల వ్యాఖ్యానించాడు.