యువభారతి

యువభారతి
యువభారతి
స్థాపన	27 అక్టోబరు 1963; 61 సంవత్సరాల క్రితం
వ్యవస్థాపకులు	ఇరివెంటి కృష్ణమూర్తి
కేంద్రీకరణ	సాహిత్య, సాంస్కృతిక సంస్థ
కార్యస్థానం	హైదరాబాదు, తెలంగాణ రాష్ట్రం;
సేవలు	180 కు పైగా గ్రంథాల ప్రచురణ
ముఖ్యమైన వ్యక్తులు	వంగపల్లి విశ్వనాథం (కన్వీనర్)

చుట్టూరా ఆవరించుకుని వున్న చీకటిని తిట్టుకుంటూ కూర్చోవడం కంటె ప్రయత్నించి ఎంత చిన్న దీపాన్నయినా వెలిగించడం మంచిది అనే ధ్యేయంతో 1963లో విజయదశమి అక్టోబరు 27 నాడు యువభారతి ఆవిర్భవించింది.^[1] ఇరివెంటి కృష్ణమూర్తి గారు దీనిని స్థాపించి అధ్యక్షుడిగా ఉన్నారు. మొదట ఈ సంస్థ కార్యస్థానం సికిందరాబాదులోని కింగ్స్‌వేలో ఉండేది. ప్రస్తుతం హైదరాబాదు లోని బొగ్గులకుంట ప్రాంతంలో ఈ సంస్థ కార్యాలయం ఉంది. ప్రస్తుతం వంగపల్లి విశ్వనాథం గారు ఈ సంస్థకు సమావేశ కర్త (కన్వీనర్) గా, డా. ఆచార్య ఫణీంద్ర అధ్యక్షులుగా, జీడిగుంట వెంకట్రావు కార్యదర్శిగా వ్యవహరిస్తున్నారు.ఈ సంస్థ ప్రచురించే ప్రచురణల రూపకల్పనకు సుధామ ప్రధాన సంపాదకులుగా వ్యవహరిస్తున్నారు. యువభారతి సమాజ హితం కోసం, సాహిత్య అభ్యుదయం కోసం కృషిచేస్తున్నది. సమాజంలో సౌమనస్యం, సౌజన్యం పెంపొందించడానికి ప్రయత్నిస్తున్నది. వ్యక్తులు ఉన్నత భావాలను, నిర్మాణాత్మక దృక్పథాలను ఏర్పరచుకోడానికి ప్రోత్సహిస్తున్నది.

యువభారతి సంస్థ "సమయపాలన మా క్రమశిక్షణ" నినాదంతో, సాహిత్య సభలను ఒక ప్రత్యేక ఒరవడి, శైలిలో నిర్వహించడం, అత్యధికస్థాయిలో సాహిత్య ప్రసంగాలను / ఉపన్యాసాలను పుస్తకరూపంలో తీసుకురావడం ద్వారా, సాహిత్యాసక్తపరులకు పఠనయోగం కల్పించడంలో అర్థ శతాబ్దకాలంగా, స్వర్ణోత్సవాలను ఘనంగా నిర్వహించుకున్న నేపథ్యంలో, అసామాన్య సేవలను అందించడం ప్రధాన ధ్యేయ లక్ష్యాలతో సంస్థ నిర్వహింపజేసుకోవడంలో తనదైన ప్రత్యేకతను సంతరించుకున్న సాహితీ సాంస్కృతిక సంస్థ.

విశేషాలు^[2],^[3]

మారుతున్న విలువలు రచయితల బాధ్యతలు అని 1970 లో 'రచన' చర్చాగోష్ఠి నిర్వహించింది.
పాతకొత్తల మేలు కలయికను ప్రాతిపదికగా పెట్టుకుని ఇప్పటివరకు 200 పుస్తకాలకు పైగా ప్రచురించింది.
నందిని అనే మాసపత్రికను నడిపింది.
ప్రాచీన ప్రబంధాలపై దివాకర్ల ఉపన్యాసాలను ఏర్పాటు చేసి ఆ ఉపన్యాసాలను కావ్యలహరి పేరుతో గ్రంథస్తం చేసింది.
లహరి శీర్షికలో విశ్వనాథ నుండి విప్లవ కవులదాకా ప్రసంగాలను ఏర్పాటు చేసి ఆ వ్యాసాలను పుస్తకరూపంలో తెచ్చింది.
భారత స్వాతంత్ర్య రజతోత్సవాల సందర్భంగా 1972లో స్వాతంత్ర్య యుగోదయంలో (1947- 72) తెలుగు తీరుతెన్నులు గురించి మహతి పేర నూటొక్కవ్యాసాల సమీక్షావ్యాస సంకలనం ప్రచురించింది.

కార్యక్రమాలు

ప్రతి నెల మొదటి ఆదివారం యువకులకు ఉచితంగా వ్యక్తిత్వ వికాస కార్యక్రమాలను నిర్వహిస్తున్నది.
వక్తృత్వం, రచన, సమీక్ష మొదలగు సామర్థ్యాలను పెంపొందించుకోడానికి 'ప్రతిభ' కార్యక్రమాన్ని నిర్వహిస్తున్నది.
ప్రముఖుల జయంతి సభలను ఇతర సాహితీ సభలను ఏర్పాటు చేస్తున్నది.
2012 లో స్వర్ణోత్సవాలు జరుపుకుంది.
2023 సంవత్సరంలో జరుపుకున్న వజ్రోత్సవ వేడుకలకు నాందిగా ఉభయ తెలుగు రాష్ట్రాలలోని ప్రసిద్ధ విద్వత్ ప్రవచనకారులను రావించి వారిచే "మహాభారతోపన్యాస లహరి", "శ్రీమద్రామాయణము - మానవీయ సంబంధాలు" అన్న అంశాలపై ప్రసంగాలను ఇప్పించి గ్రంథాలుగా ముద్రించి సాహితీ లోకానికి అందించింది.
2023 వజ్రోత్సవ సమాపన సందర్భంగా యువభారతిని నడిపిన వారు, యువభారతితో కలిసి నడచినవారు, యువభారతితో స్ఫూర్తి పొందినవారు, యువభారతి గ్రంథాల పఠనంతో ఎదిగి వివిధ రంగాలలో ఉన్నత శిఖరాలకు చేరుకోన్నవారు, ఇతర సాహితీ మూర్తులు - యువభారతి పట్ల తమకు గల గౌరవాన్ని, అనుబంధాన్ని, ఆత్మీయతను రంగరించి అందించిన వ్యాసాల సమాహారంగా, యువభారతి వజ్రోత్సవ ప్రచురణగా - "యువభారతి వజ్రోత్సవ హారతి" ని ప్రచురించింది.