నిష్కలంక్ మహాదేవ్ ఆలయం
నిష్కలంక్ మహాదేవ్ ఆలయం గుజరాత్ లోని భావ్‌నగర్ సమీపంలోని సముద్రం లోపల వున్న శివాలయం. సాధారణంగా హిందూ ఆలయాలు కొండల్లోనూ, నదీ తీరంలోను, సముద్రం తీరంలోను, వుంటాయి. కానీ ఈ ఆలయం సముద్రంలో ఉంది.[1]
నిష్కలంక్ మహా దేవ్ ఆలయం గుజరాత్ లోని భావ్ నగర్ కి 23 కిలో మీటర్ల దూరంలో, అరేబియా సముద్ర తీరంలో కొలియాక్ గ్రామం వున్నది. అక్కడ సముద్ర తీరంలోపల మూడు కిలోమీటర్ల దూరంలో వెలసింది. ఈ ఆలయంలోని శివుడిని ఎప్పుడు పడితే అప్పుడు దర్శించుకునే వీలుండదు. ఎందుకంటే రాత్రి ఎనిమిది గంటల ప్రాంతంలో ఆ ఆలయం నుండి మూడు కిలో మీటర్ల ముందు వరకు ఉధృతమైన అలలు వచ్చేస్తాయి. దాంతో ఆ గుడి సముద్రంలో మునిగి పోతుంది. అప్పుడు గుడి ఆనవాళ్లు కూడ కనబడవు. మధ్యాహ్నం ఒంటి గంట ప్రాంతంలో నిదానంగా అలలు వెనక్కి వెళ్లిపోవడంతో గుడి బయటికి కనబడుతుంది. ఈ దృశ్యాన్ని చూడడానికే భక్తులు సముద్ర తీరానికి వస్తారు.[2]
స్థల పురాణం
మార్చుమహా భారత యుద్ధంలో పాండవులు గెలిచినా వారికి దాయాదులను చంపిన పాపం చుట్టుకుంటుంది. దాంతో ఆ పాపం నుండి విముక్తి పొందడానికి శ్రీకృష్ణుడిని శరణు కోరగా శ్రీకృష్ణుడు 'ఒక నల్లని ఆవుకు నల్లని జండా కట్టి అది ఎంత దూరం వెళితే అంత దూరం వెళ్లమని, ఎప్పుడైతే ఆ ఆవూ, జండా రెండు తెల్లగా మారతాయో అప్పుడు ఆ పాపం నుంచి ముక్తి లభిస్తుందని ' చెప్తాడు. ఆ మేరకు పాండవులు రోజులతరబడి ఆ ఆవు వెంట నడిచి వెళతారు. చివరికి కొలియాక్ గ్రామం సరిహద్దుల్లో అరేబియా సముద్ర తీరానికి చేరగానె ఆవు, జెండా తెల్లగా మారిపోతాయి. ఆ ప్రాంతంలో పాండవులు శివనామం జపిస్తూ ఘోర తపస్సు చేయగా అప్పుడు శివుడు ఆ పంచ పాడవులకు ఒక్కొక్కరి ఎదుట ఒక్క స్వయంభూ శివలింగంగా అవతరిస్తాడు. ఆనందంతో పాండవులు ఆ అయిదు లింగాలకుపూజలు నిర్వహించి ఆలయాన్ని నిర్మిస్తారు. ఆ విధంగా పాండవులకు కళంకాలు తొలిగిపోగా ఆ ప్రదేశమే నిష్కలంక్ మహాదే వాలయంగా ప్రసిద్ధి పొందిందని పురాణ గాధ[3].
దైవ దర్శనం
మార్చుఉదయం పది గంటలకే భక్తులు సముద్ర తీరానికి వస్తారు. రానురాను అలల ఉదృతి తగ్గగానే మెల్లమెల్లగా జెండాతో ఓ స్తూపము, ఐదు శివలింగాలు దర్శనమిస్తాయి. అప్పుడు భక్తులు వెళ్లి ఆ లింగాలకు పూజలు చేస్తారు. అమావాస్య, పౌర్ణమి రోజుల్లో, మహా శివరాత్రి రోజుల్లో ప్రత్యేక పూజలు నిర్వహిస్తారు భక్తులు. మరణించిన తమ పెద్దల అస్తికలను అక్కడ సముద్రంలో కలిపితే వారి అత్మ శాంతిస్తుందని భక్తుల విశ్వాసం. అందుకోసం జనాలు ఎక్కువ సంఖ్యలో వస్తుంటారు[4].
వెళ్ళే మార్గం
మార్చుసికింద్రాబాద్ నుండి వెళ్లే భావనగర్ ఎక్స్‌ప్రెస్ లో భావనగర్ చేరి అక్కడి నుండి బస్సులు, ఆటోలు, టాక్సీల ద్వారా కొలియాక్ వెళ్లి స్వామిని దర్శనం చేసుకోవచ్చు.
మూలాలు
మార్చు- ↑ "ఈనాడు ఆదివారం 19 జనవరి, 2020".
- ↑ "NISHKALANK MAHADEV TEMPLE - TRAVEL INFO". Trawell.in. Retrieved 2020-02-02.
- ↑ "Nishkalank Mahadev Temple History | Nishkalank Mahadev Bhavnagar Gujarat". PavitraTour (in అమెరికన్ ఇంగ్లీష్). 2018-04-18. Archived from the original on 2020-02-02. Retrieved 2020-02-02.
- ↑ "Nishkalank Mahadev Temple – The Miraculous Temple of Lord Shiva which Disappears only to Reappear !!". Gosthala (in అమెరికన్ ఇంగ్లీష్). 2018-04-13. Retrieved 2020-02-02.