అనామిక (2014 సినిమా)

అనామిక శేఖర్ కమ్ముల దర్శకత్వంలో 2014లో వచ్చిన తెలుగు సినిమా. విద్యా బాలన్, పరంబ్రతా ఛటర్జీ తదితరులతో 2012లో తీసిన హిందీ సినిమా కహానీ ఆధారంగా దీపక్ ధర్, రజనీష్ కనుజాలు దీనిని తెలుగులో అనామిక పేరుతోనూ, తమిళ భాషలో నీ ఎంగె ఎన్ అన్బె అనే పేరుతోనూ పునర్నిర్మించారు.

అనామిక
అనామిక పోస్టర్
దర్శకత్వం	శేఖర్ కమ్ముల
స్క్రీన్ ప్లే	యండమూరి వీరేంద్రనాథ్ శేఖర్ కమ్ముల
దీనిపై ఆధారితం	కహానీ   by సుజయ్ ఘోష్ అద్వైత కళ
నిర్మాత	దీపక్ ధర్ సమీర్ గొగాటే రజనీష్ కనూజా సమీర్ రాజేంద్రన్
తారాగణం	నయనతార వైభవ్ రెడ్డి పశుపతి హర్షవర్ధన్ రాణే
ఛాయాగ్రహణం	విజయ్ సి.కుమార్
కూర్పు	మార్తాండ్ కె.వెంకటేష్
సంగీతం	ఎం.ఎం.కీరవాణి
నిర్మాణ సంస్థలు	లాగ్‌లైన్ ప్రొడక్షన్స్ సెలెక్ట్ మీడియా హోల్డింగ్స్
విడుదల తేదీ	1 మే 2014 (2014-05-01)
సినిమా నిడివి	145 నిమిషాలు
దేశం	భారతదేశం
భాషలు	తెలుగు తమిళ్

నటీనటులు

• నయనతార - అనామిక
• వైభవ్ రెడ్డి- పార్థసారథి, పోలీస్ అధికారి
• హర్షవర్ధన్ రాణే
• ధీర్ చరణ్ శ్రీవాత్సవ
• పశుపతి

సాంకేతికవర్గం

• స్క్రీన్ ప్లే : యండమూరి వీరేంద్రనాథ్, శేఖర్ కమ్ముల
• ఛాయాగ్రహణం: విజయ్ సి.కుమార్
• కూర్పు: మార్తాండ్ కె.వెంకటేష్
• సంగీతం: ఎం.ఎం.కీరవాణి
• పాటలు: సిరివెన్నెల సీతారామశాస్త్రి

కథ

ఉద్యోగ నిమిత్తం భారతదేశం వచ్చి అడ్రస్ లేకుండా పోయిన తన భర్తను వెతుక్కుంటూ విదేశం నుండి హైదరాబాద్‌కు వస్తుంది అనామిక! ఎయిర్ పోర్టులో విమానం దిగీదిగడమే ఓల్డ్ సిటీలోని పోలీస్ స్టేషన్‌కు వెళ్ళి ఫిర్యాదు చేస్తుంది. తన భర్త అజయ్ శాస్త్రి గత కొంత కాలంగా కనిపించడం లేదని, అతని ఆచూకి తెలియచేయమని కోరుతుంది. పోలీస్ స్టేషన్‌లో మిశ్రమ స్పందన లభించినా... పార్థసారథి అనే పోలీస్ అధికారి మాత్రం ఆమెకు సాయం చేయడానికి ముందుకొస్తాడు. దర్యాప్తు ఓ కొలిక్కి వచ్చేవరకూ తాను ఇక్కడే ఉంటానంటూ అనామిక| ఓల్డ్ సిటీలోని గెలాక్స్ హెూటల్లో బసచేస్తుంది. మధ్యలో పోలీస్ ఉన్నతాధికారులతోనూ, రాజకీయ నాయకులతోనూ ఆమెకు సమస్యలు ఎదురవుతాయి. వాటిని అధిగమించి అనామిక తన భర్త అచూకీని ఎలా తెలుసుకుంది? ఆ తర్వాత ఏం జరిగిందన్నది మిగతా కథ.

పాటలు

ఈ సినిమాలోని పాటలను సిరివెన్నెల సీతారామశాస్త్రి వ్రాయగా ఎం.ఎం.కీరవాణి బాణీలు కట్టాడు.

పాటల వివరాలు

సం.	పాట	గాయకుడు(లు)	పాట నిడివి
1.	"క్షణం క్షణం"	సునీత	4:15
2.	"ద సర్చ్"	సునీత	1:48
3.	"డెడ్ ఆర్ అలైవ్"	సునీత	1:51
4.	"అద్దంలో అమ్మాయి"	దీపు	3:49
మొత్తం నిడివి:			11:43

స్పందనలు

• అనామికగా నయనతార చక్కటి నటన ప్రదర్శించింది. అమాయకులైన ప్రజలను పొట్టన పెట్టుకున్న ఉగ్రవాది అయిన భర్తను హతమార్చే ముందు కనీసం కొన్ని బలమైన, ప్రభావవంతమైన సంభాషణలు ఉండి ఉండాల్సింది. ఇతర పాత్రలలో చెప్పుకోవాల్సింది వైభవ్ గురించి. పోలీస్ అధికారి పార్థసారథిగా అతను పాత్రోచితంగానే నటించాడు. కీరవాణి సంగీతం, సీతారామ శాస్త్రి సాహిత్యం సన్నివేశ బలాన్ని పెంచే విధంగానే ఉన్నాయి. అలానే విజయ్ సి. కుమార్ కెమెరా పనితనం చెప్పుకోదగ్గదే. పాతబస్తీ వాతావరణాన్ని చక్కగా తెరకెక్కించారు. 'కహానీ' సినిమాకు తమదైన మార్కుతో ప్రేక్షకుల ముందుకు తీసుకురావాలని శేఖర్ కమ్ముల అనుకోవడం వల్ల 'అనామిక' చిత్రం పేలవంగా తయారైంది. బహుశా ఉత్తమ చిత్రాల దర్శకుడిగా ఇమేజ్ సంపాదించుకున్న శేఖర్ కమ్ముల కాకుండా మరెవరినైనా దర్శకుడిగా పెట్టి ఈ సినిమా యథాతథంగా తీసి ఉంటే ఫలితం కొంతలో కొంత మెరుగ్గా ఉండి ఉండేది. - వడ్డి ఓంప్రకాశ్ నారాయణ్, ఫిల్మ్ జర్నలిస్ట్
• విద్యాబాలన్ నటించిన కహాని వంటి విమర్శకుల ప్రశంసలు పొందిన చిత్రాన్ని రీమేక్ చేసినప్పుడు పోలికలు అనివార్యం. అనామిక విషయంలో, శేఖర్ కమ్ముల దాదాపుగా విఫలమయ్యాడు. ఎందుకంటే అతను అసలు కథను ప్రక్కదారి మళ్ళించాడు. - హేమంత్ కుమార్, టైమ్స్ ఆఫ్ ఇండియా

బయటి లింకులు

• ఇంటర్నెట్ మూవీ డేటాబేసు లో అనామిక