ఉగాది కవి సమ్మేళనం

ఉగాది కవిసమ్మేళనం ప్రతి సంవత్సరాదికి పలు తెలుగు గ్రామాల్లో, పట్టణాల్లో నిర్వహించే కార్యక్రమం. కళాపోషకులు, సాహిత్యాభిమానులు, సాహిత్యసంస్థలు ఈ కార్యక్రమాన్ని నిర్వహిస్తూండగా వాటిలో కవులు పాల్గొని తమ కవితలను వినిపిస్తూంటారు. ఉగాది కవిసమ్మేళనం ఆకాశవాణిలోనూ, దూరదర్శన్‌లోనూ నిర్వహిస్తూంటారు. కవిసమ్మేళనంలో సాధారణంగా సందర్భం కనుక ఉగాది గురించో, వసంతం గురించో వ్రాసినా వాటి గురించే వ్రాయాలన్న నియమం ఏమీ లేదు. వీటిలో సాహితీ పురస్కారాలు, సత్కారాలు జరుగుతుంటాయి. ఉగాది కవి సమ్మేళనాలు తెలుగు రాష్ట్రాలలోను, అంతర్జాతీయ అంతర్జాతీయ వేదికలలో కూడా జరుగుతున్నాయి.

ఉగాది అంటే 'కొత్త శకం' అని అర్థం. చైత్ర మాసంలో (ఏప్రిల్ లేదా మే) ప్రారంభమయ్యే తెలుగు వారి నూతన సంవత్సర దినంగా పరిగణించబడే తెలుగు పండుగలలో ఉగాది మొదటిది. ఉగాది పంచాంగ శ్రవణానికి, సాంస్కృతిక కార్యక్రమాలకు, కవులు ఒకచోట చేరి కవిసమ్మేళనాలలో పద్యాలు చదివేందుకు ఒక సందర్భం.

2014 నుండి 2017 వరకు అవిభాజ్య ఆంధ్రప్రదేశ్‌లో ఇంకా తెలంగాణలో దశాబ్దాల పాటు రవీంద్ర భారతి సభా భవనంలో ఉగాది సమ్మేళనాలు జరుపుకున్నారు. 2018లో, ప్రగతి భవన్‌లోని తన నూతన కార్యాలయం అధికారిక నివాసానికి వేడుకలను తరలించాలని ముఖ్యమంత్రి కె. చంద్రశేఖర రావు నిర్ణయించారు. అయితే, తరువాత 3 సంవత్సరాలు 2019లో ఎన్నికల ప్రవర్తనా నియమావళి వలన, 2020 - 2021లో కరోనావైరస్ నియంత్రణల వలన ఉగాది వేడుకలు జరగలేదు.

2016 - రవీంద్ర భారతిలో కవిసమ్మేళనం

• 
  ఫణీంద్ర
• 
  కవిసమ్మేళనం లో పాల్గొన్న కవులు
• 
  ఎస్ . వి . సత్యనారాయణ
• 
  తిరుమల శ్రీనివాసాచార్య
• 
  వేల్పుల నారాయణ
• 
  ఎస్.వి. సత్యనారాయణ, మామిడి హరికృష్ణ, కాసుల ప్రతాపరెడ్డి, అన్వర్
• 
  జూపాక సుభద్ర

2017 - రవీంద్ర భారతిలో కవిసమ్మేళనం

• 
  ఉగాది కవి సమ్మేళనంలో కవులు (29.03.2017)
• 
  రవీంద్ర భారతిలో ఉగాది కవి సమ్మేళనంలో కవులు
• 
  తిరునగరి దేవకీదేవి
• 
  స్వాతి శ్రీపాద
• 
  అన్వర్

2023లో తెలంగాణా రాష్ట్ర ప్రభుత్వం రవీంద్రభారతిలో తెలుగు సంవత్సరాది శోబకృత్ ఉగాది వేడుకలను నిర్వహించింది. రవీంద్ర భారతిలో బుధవారం జరిగిన శోభకృత్‌ ఉగాది వేడుకల్లో భాగంగా దేవాదాయ శాఖ మంత్రి ఉగాది పురస్కారాలను ప్రదానం చేశారు. వేదపారాయణులు, అర్చకులు, నాదస్వర విద్వాంసులు, వేద, వీరశైవ ఆగమ పండిట్‌లు, జ్యోతిష్యులు, ఆధ్యాత్మిక వేత్తలకు మొత్తం 34 మందికి పురస్కారాలు, నగదు ప్రోత్సాహకాలను అందజేసి ఘనంగా సత్కరించారు. సాయంత్రం నిర్వహించిన కవి సమ్మేళనంలో కవులు, కళాకారులను సత్కరించి నగదు ప్రోత్సాహకాలను అందజేశారు.

2024లో

శ్రీ కాళహస్తిలో క్రోధినామ సంవత్సర ఉగాదిని పురస్కరించుకుని ధూర్జటి రసజ్ఞ సమాఖ్య సాహితీ కళావేదిక ఆధ్వర్యంలో కైకాలవారి కళ్యాణ మండపంలో ఉగాది కవి సమ్మేళనం నిర్వహించారు. ఈ సందర్భంగా పలు ప్రాంతాల నుంచి వచ్చేసిన కవులు వారి స్వీయ కవితలు వినిపించారు. లగడపాటి భాస్కర్‌ సాహితీ పురస్కారాలను వారి కుమార్తెలు కిరణ్మయి, కృష్ణశశిలు శతావధాని ఆముదాల మురళికి, రచయిత చెంచుకష్ణ పిళ్ళైకి అందచేశారు. అనంతరం కవితలు చదివిన కవులందరికి జ్ఞాపకలతో సత్కరించారు.

వంశీ అంతర్జాతీయ సాహితీ పీఠం, శ్రీ సాంస్కృతిక కళాపీఠం- సింగపూర్ సంస్థలు సంయుక్తంగా శ్రీ క్రోధినామ ఉగాదిని పురస్కరించుకుని 11 దేశాల (అమెరికా , కెనడా , న్యూజిలాండ్ , సింగపూర్ , మలేసియా , ఇండోనేషియా, ఖతార్ , ఒమాన్ , యుఎఇ, పోలాండ్ , యూకే) నుండి 40 మంది కవులు కవయిత్రులు పాల్గొన్నారు . వీటి నిర్వాహకులు వంశీ అంతర్జాతీయ సాహితీ పీఠం వ్యవస్థాపకుడు వంశీ రామరాజు, శ్రీ సాంస్కృతిక కళాపీఠం వ్యవస్థాపకులు కవుటూరు రత్నకుమార్. ముఖ్య అతిధిగా యార్లగడ్డ లక్ష్మిప్రసాద్, విశిష్ట అతిధిగా సినీ గేయరచయిత భువనచంద్ర పాల్గొన్నారు.

ఇతర లింకులు

• ఉగాది

• ఉగాది పురస్కారాలు
• http://www.ravindrabharathi.in/other-activities/index.html