ద్వారక మఠం

ద్వారకాలోని శారదా పీఠం ఆది శంకరాచార్యులు శారదా పీఠం క్రీ.శ.8వ శతాబ్దంలో స్థాపించ బడింది. ద్వారకా మఠము జగద్గురు ఆది శంకరులచే స్థాపించబడిన నాలుగు మఠములలో ఒకటి. ఈ మఠం క్షేత్రం గుజరాత్లో ద్వారకా క్షేత్రము వద్ద ఉంది.ద్వారకాతో పాటు జ్యోతిర్మఠం, శృంగేరి, పురిలో కూడా ఇలాంటి పీఠాలు ఉన్నాయి. ఈ నాలుగు మఠాలు హిందూ తత్వశాస్త్రం, సనాతన ధర్మ మత ఆచారాలను, ఆధ్యాత్మిక సాక్షాత్కారానికి మార్గం అయిన అద్వైత వేదాంతం సిద్ధాంతంతో ఏర్పడినవి.

మఠ విశేషాలు

• ఈ మఠము దేశానికి పశ్చిమంగా, మొదటగా స్థాపించబడింది.
• దీనిని కాళికామఠమనీ, సిద్ధేశ్వరమఠమనీ, పశ్చిమామ్నాయ మఠమనీ అంటారు.
• ఇది కీటవాళ సాంప్రదాయ మఠము. భూతదయతో నిత్యము కీటకములు మొదలైన వాటిని హింసించకుండా అహింసా వ్రతాన్ని ఆచరించడాన్ని కీటవాళ సాంప్రదాయమంటారు.
• ఈ మఠ సన్యాసులకు చివర 'తీర్ధ' అనిగాని 'ఆశ్రమ' అని గాని ఉంటుంది.
• పీఠ దేవత సిద్ధేశ్వరుడు; పీఠ శక్తి భద్రకాళి.
• మఠము యొక్క మొదటి ఆచార్యుడు శంకరుని ముఖ్య శిష్యులలో ఒకడైన పద్మపాదాచార్యుడు.
• గోమతీ నది ఈపీఠ తీర్థము.

ఇక్కడ ఉండే బ్రహ్మచారులను స్వరూపులని వ్యవహరిస్తారు. సన్యాసంతీసుకోబోయేముందు బ్రహ్మచారిగాచేరి శిక్షణపొంది సన్యాసం స్వీకరిస్తారు. స్వరూపులనే ఈ మఠ సన్యాసులు సామవేదాన్ని ప్రత్యేకంగా అధ్యయనం చేయవలసి ఉంది. తత్త్వమసి అనేది ఈమఠంయొక్క మహావాక్యం. ఈ వాక్యం జీవ, బ్రహ్మల ఐక్యతను ప్రతిపాదిస్తుంది. బ్రహ్మచారులు అవిగత గోత్రానికి చెందినవారుగా పరిగణింప బడతారు. సింధు, సౌరాష్ట్ర, మహారాష్ట్రములు వాటి మధ్యనున్న పశ్చిమభారత ప్రాంతం ఈ మఠం పరిధిలోకి వస్తాయి. ఈ ప్రాంతంలో హిందూమతధర్మాన్ని సుస్థిరం చేయవలసిన బాధ్యత ఈ ద్వారకామఠానిది.

పీఠాధిపతులు

ప్రస్తుత పీఠాధిపతి శంకరాచార్య స్వామి స్వరూపానంద మృతితో వారసులను ప్రకటించాల్సి రావడంతో ద్వారకా శారదా పీఠాధిపతిగా స్వామి సదానంద సరస్వతి, స్వామి అవిముక్తేశ్వరానంద్ సరస్వతి జ్యోతిష్ పీఠానికి కొత్త శంకరాచార్యుడని దివంగత స్వరూపానంద సరస్వతి వ్యక్తిగత కార్యదర్శి సుబోధానంద్ మహరాజ్ తెలిపారు. ఆది శంకరాచార్యులు ఉత్తరాన బదరికాశ్రమం జ్యోతిర్పీఠం, పశ్చిమాన ద్వారకా శారదా పీఠం, తూర్పున పూరీలోని గోవర్ధన్ పీఠం, కర్ణాటకలోని చిక్కమగళూరు జిల్లాలోని శృంగేరి శారదా పీఠం వద్ద నాలుగు మఠాలను స్థాపించారు.

ఇవికూడా చూడండి

• ఆది శంకరాచార్యుడు
• పూరీ మఠం
• ద్వారక మఠం
• శృంగేరి
• బదరీనాథ్ మఠం