గాలిమేడలు (నాటకం)

గాలిమేడలు 1949, డిసెంబరులో అనిసెట్టి సుబ్బారావు రాసిన సాంఘీక నాటకం. మానవునిలో అంతర్లీనంగా దాగివున్న పాశవిక ప్రవృత్తి వల్ల ఎలాంటి ప్రమాదాలు జరుగుతాయో చూపించిన ఈ నాటకం, 1950 ఆగస్టులో ఆంధ్ర ఆర్ట్సు థియేటరు అధ్వర్యంతో తొలిసారిగా ప్రదర్శించబడింది.

గాలిమేడలు
కృతికర్త:	అనిసెట్టి సుబ్బారావు
దేశం:	భారతదేశం
భాష:	తెలుగు
ప్రక్రియ:	నాటకం
ప్రచురణ:	దేశికవిమండలి, విజయవాడ
విడుదల:	జనవరి 1953
పేజీలు:	118

కథానేపథ్యం

సమాజంలో డబ్బుకు ఎంతటి విలువ ఉందో, డబ్బున్నవారికి సమాజంలో ఎలాంటి గౌరవ మర్యాదలు లభిస్తాయో ఈ నాటకంలో చూపించబడింది. కలల్లో తేలియాడే మధ్యతరగతి వారి మనస్తత్వాన్ని, మందహాసాన్ని ఈ నాటకం వ్యంగ్యంగా చిత్రించింది. మోసం, ద్రోహం, స్వార్ధబుద్ధితో ఉంటూ... డబ్బుకే ప్రాధాన్యత ఇస్తున్న నేటి సాంఘిక వ్యవస్థ మారాలని ఈ నాటకం ద్వారా సందేశం ఇవ్వబడింది.

మధ్యతరగతి మనిషి జీవితంలో నిత్యం ఎదురయ్యే సమస్యలను అధిగమించేందుకు దారిలేక అవకాశం దొరికినప్పుడల్లా స్వప్నంలో తన సమస్యలను మర్చిపోయి ఆనందకర జీవితాన్ని అనుభవించినట్టు చూపించబడింది.

పాత్రలు

1. మాణిక్యాలరావు
2. అన్నపూర్ణ
3. కృష్ణ
4. కాబూలీవాలా
5. నారాయణరావు
6. ఆంజనేయులు
7. సీతారామయ్య
8. హోటల్ యజమాని
9. పోలీస్ ఆఫీసర్
10. నరసయ్య
11. వెంకట్రావు
12. వెయిటర్

ఇతర వివరాలు

1. సిగ్మండ్ ఫ్రాయిడ్ మనో విశ్లేషణ సిద్ధాంతం ఆధారంగా ఈ నాటకం రాయబడింది.
2. బెర్టోల్ట్ బ్రెహ్ట్ ప్రతిపాదించిన ఎలియనేషన్ సిద్ధాంతం అనే ప్రయోగాన్ని ఆధునిక నాటకరంగంలో తొలిసారిగా ఈ నాటకంతోనే ప్రారంభమయింది. ప్రదర్శన సమయంలో ప్రేక్షకుల నుండి పాత్రలు రంగస్థలంపైకి ప్రవేశిస్తాయి.
3. విజయవాడలోని ఆంధ్ర ఆర్ట్స్‌ అకాడమీ నాటక సంస్థ ఆధ్వర్యంలో సినీనటులు నాగభూషణం, మిక్కిలినేని రాధాకృష్ణమూర్తి, కర్నాటి లక్ష్మీనరసయ్య, కారెపు అప్పలస్వామి వంటి వారు ఈ నాటకాన్ని రాష్ట్రవ్యాప్తంగా ప్రదర్శించారు.

ఇతర లంకెలు

• ఆర్కైవ్ లో గాలిమేడలు నాటక ప్రతి