రామిరెడ్డి (నటుడు)

గంగసాని రామిరెడ్డి భారతదేశపు ప్రముఖ నటుడు. ఇతడు ప్రతినాయక పాత్రలకు ప్రసిద్ధి. దాదాపు అన్ని భారతీయ భాషలలో నటించాడు. తెలుగులో అంకుశం చిత్రం ద్వారా నట జీవితాన్ని ప్రారంభించిన రామిరెడ్డి, అ చిత్రం ఘనవిజయం సాధించడంతో తెలుగు, తమిళ, కన్నడ, హిందీ, మలయాళం, భోజ్‌పురి భాషలలో ప్రతినాయకుడిగా దాదాపు 250 చిత్రాలలో నటించాడు.

రామిరెడ్డి
రామిరెడ్డి
జననం	గంగసాని రామిరెడ్డి ఓబుళంవారిపల్లె, చిత్తూరు జిల్లా
ఇతర పేర్లు	అంకుశం రామిరెడ్డి
వృత్తి	నటుడు
క్రియాశీల సంవత్సరాలు	1990 - 2011
ఎత్తు	5'10"

వ్యక్తిగత జీవితము

రామిరెడ్డి చిత్తూరు జిల్లా, వాయల్పాడులో జన్మించాడు. ఆయన చదువంతా హైదరాబాదులోనే సాగింది. ఉస్మానియా యూనివర్శిటీ నుంచి జర్నలిజంలో పట్టా పొందిన ఈయన నటుడు కాక మునుపు ఓ ఉర్దూ పత్రికలో విలేఖరిగా పనిచేశాడు. కొంతకాలం మూత్రపిండాల సంబంధ వ్యాధి కారణంగా మృత్యువు అంచుల వరకు వెళ్ళి వచ్చాడు. కానీ అదే వ్యాధితో హైదరాబాదులోని కిమ్స్‌ ఆసుపత్రిలో చికిత్స పొందుతూ ఏప్రిల్ 14, 2011 న మృతి చెందాడు. ఆయనకు ఇద్దరు కుమార్తెలు, ఒక కొడుకు.

సినిమాలు

1989 లో రాజశేఖర్ కథానాయకుడిగా వచ్చిన అంకుశం సినిమాలో ప్రతినాయకుడిగా సినిమాల్లోకి అడుగు పెట్టాడు. తొలి సినిమాకే ఆయన నంది పురస్కారం అందుకున్నాడు. ఆ తర్వాత ఆయనకు చాలా సినిమాల్లో ప్రధాన ప్రతినాయకుడిగా అవకాశాలు లభించాయి. అంకుశం సినిమాను హిందీలో ప్రతిబంధ్ పేరుతో పునర్నిర్మాణం చేస్తే అందులో కూడా ఆయన ప్రధాన విలన్ గా నటించాడు. అంకుశం, ఒసేయ్ రాములమ్మా, పెద్దరికం, అమ్మోరు, గాయం, అనగనగా ఒక రోజు, అడవిచుక్క, నాగప్రతిష్ఠ (2003), తెలుగోడు, జగద్గురు శ్రీ షిర్డీ సాయిబాబా వీడు మనవాడే ఆయనకు గుర్తింపు తెచ్చిపెట్టిన సినిమాలు. ఆయన ఆఖరి చిత్రం మర్మం. ఎక్కువగా ప్రతినాయక పాత్రలే పోషించినా పెద్దరికం, అనగనగా ఒక రోజు లాంటి చిత్రాలలో వైవిధ్యభరితమైన పాత్రలు పోషించాడు.

పేరుపడ్డ సంభాషణలు

• స్పాట్ పెడతా

కేసు

జనవరి 19, 2007 శనివారం రాత్రి 11:45 సమయంలో మెహదీపట్నంలోని రైతు బజార్ సమీపంలో పోలీసులు ఆయనను మద్యంతాగి వాహనం నడుపుతున్నందుకు అరెస్టు చేశారు. ఆ సమయంలో రామిరెడ్డి నగర శివార్లలో ఓ కార్యక్రమానికి హాజరై శ్రీనగర్ కాలనీలో ఉన్న తన ఇంటికి వస్తున్నట్లు పోలీసులు తెలియజేశారు. మరుసటి రోజు బెయిల్ పై విడుదల చేశారు.