ఇందుపల్లి గోవిందరావు

ఇందుపల్లి గోవిందరావు (ఆగస్టు 12, 1897 - సెప్టెంబరు 8, 1969) రంగస్థల నటుడు, స్త్రీ పాత్రధారి. రంగభూషణం బిరుదాంకితుడు.

ఇందుపల్లి గోవిందరావు
జననం	ఆగస్టు 12, 1897
మరణం	సెప్టెంబరు 8, 1969
జాతీయత	భారతీయుడు
వృత్తి	రంగస్థల నటుడు, స్త్రీ పాత్రధారి
తల్లిదండ్రులు	కృష్ణారావు, లక్ష్మీకాంతమ్మ

జననం

గోవిందరావు 1897, ఆగస్టు 12న కృష్ణారావు, లక్ష్మీకాంతమ్మ దంపతులకు జన్మించాడు.

నాటకరంగ ప్రస్థానం

చిన్నతనంలోనే నటన, సంగీతంలో ప్రావీణ్యం సంపాదించుకున్న గోవిందరావు, తారాశశాంకంలో రెండవ చంద్రుడు పాత్ర ద్వారా రంగస్థలంపై అడుగుపెట్టాడు. అప్పటినుండి అనేక నాటకాల్లో నటించి, పేరు, డబ్బు సంపాదించాడు. కొంతకాలం నే జీతం మీద బందరు రాయల్ థియేటర్, రామమోహన్ థియేటర్లలో స్త్రీ, పురుష పాత్రలను పోషించేవాడు. పింగళి లక్ష్మీకాంతం, బుర్రా రాఘవాచారి, మాదిరెడ్డి సుబ్బారావు, పింగళి వీరయ్య, పింగళి నర్సయ్య, కలపటపు రాజేశ్వరరావు, శ్రవణం తాతయ్య, పెదసింగు రంగయ్య, ఆమాను సుబ్బారావు వంటి ప్రముఖ నటులతో కలిసి వందలాది నాటకాలను అద్భుతంగా ప్రదర్శించాడు. 1920-21లలో విజయవాడలో జరిగిన చింతామణి నాటక పోటీలలో రాధ పాత్రకు సువర్ణ పతకం గెల్చుకోవడంతోపాటు, చిత్రరేఖ, సత్యభామ, చంద్రమతి పాత్రలకు సువర్ణ పతకాలు గెల్చుకున్నాడు. అంతేకాకుండా, గోవిందరావు ధరించిన నటనకు ముగ్దులై ప్రేక్షకులంతా రంగస్థలం మీదకు పతకాలు విసిరేసేవారు.

నటించిన పాత్రలు

1. చిత్రరేఖ
2. సత్యభామ
3. చంద్రమతి
4. చంద్రుడు
5. రాధ
6. చింతామణి
7. చంద్రముఖి
8. విమల
9. చిత్రలేఖ
10. ఇందిర
11. అన్నపూర్ణ
12. కమల
13. సావిత్రి
14. రత్నాంగి
15. సంజయుడు

మరణం

చివరిదశలో పేదరికాన్ని అనుభవించిన గోవిందరావు 1969, సెప్టెంబరు 8న మరణించాడు.