జగదేకవీరుడు అతిలోకసుందరి

తెలుగు సినిమా*వేదిక

జగదేకవీరుడు అతిలోకసుందరి 1990 లో కె. రాఘవేంద్ర రావు దర్శకత్వంలో చిరంజీవి హీరోగా వచ్చిన ఒక సోషియో ఫాంటసీ చిత్రం. ఈ చిత్రం బాక్సాఫీసు వద్ద మంచి విజయం సాధించింది.

జగదేకవీరుడు- అతిలోక సుందరి (1990 తెలుగు సినిమా)
దర్శకత్వం	కె. రాఘవేంద్ర రావు
నిర్మాణం	సి. అశ్వినీదత్
రచన	కె. రాఘవేంద్ర రావు, జంధ్యాల
తారాగణం	చిరంజీవి (రాజు), శ్రీదేవి (ఇంద్రజ), అమ్రీష్ పురి (మహాద్రష్ట), కన్నడ ప్రభాకర్, అల్లు రామలింగయ్య, తనికెళ్ళ భరణి, బ్రహ్మానందం (విచిత్ర), జె. నాగరాజ్ (పోలీస్ ఇనస్పెక్టర్), రామిరెడ్డి, సంగీత, షాలిని (బేబీ శాలిని), శామిలి (బేబీ శామిలి), ఆర్.ఎస్. శివాజీ (మాలోకం)
సంగీతం	ఇళయరాజా
నేపథ్య గానం	కె.ఎస్.చిత్ర, ఎస్.పి. బాలసుబ్రహ్మణ్యం, ఎస్.జానకి
నృత్యాలు	ప్రభుదేవా
గీతరచన	వేటూరి
ఛాయాగ్రహణం	అజయ్ విన్సెంట్
నిర్మాణ సంస్థ	వైజయంతి మూవీస్
విడుదల తేదీ	మే 9, 1990
భాష	తెలుగు
ఐ.ఎమ్.డీ.బి పేజీ

కథ

ఆంజనేయస్వామి భక్తుడైన రాజు (చిరంజీవి) ఒక గైడ్. అనాథ పిల్లలని నలుగురిని తనతో బాటు పెంచుకుంటూ ఉంటాడు. ఆ పిల్లలలో ఒక అమ్మాయికి ఒక ప్రమాదంలో కాలు విరిగిపోతుంది. హిమాలయాల్లో మాత్రమే లభ్యమయ్యే ఒక మూలికతో ఆ అమ్మాయిని మళ్ళీ నడిచేలా చేయవచ్చని ఒక స్వామి చెప్పటంతో రాజు హిమాలయాలకి బయలుదేరతాడు. ఆ మూలికను సంపాదించి తిరిగి వస్తుండగా, దారి తప్పి మానససరోవరానికి వస్తాడు. స్వర్గలోకాన ఇంద్రుని పుత్రిక అయిన ఇంద్రజ (శ్రీదేవి) భూలోకాన మానససరోవరం అందంగా ఉంటుందని తెలుసుకొని తండ్రి వద్ద అనుమతి తీసుకొని అక్కడకు వస్తుంది. తిరిగి వెళ్ళు సమయంలో స్వర్గలోక ప్రవేశం గావించే ఉంగరాన్ని జారవిడుచుకొంటుంది. దానితో ఆమెకి స్వర్గలోక ద్వారాల వద్దే నిషేధం కలుగుతుంది. రాజు వద్ద తన ఉంగరం ఉందని తెలుసుకొన్న ఇంద్రజ పిల్లల ద్వారా అతనికి చేరువై ఆ ఉంగరాన్ని సంపాదించే ప్రయత్నంతో నిజంగానే అతనిని ప్రేమిస్తుంది. మహాదృష్ట (అమ్రిష్ పురి) అనే దృష్ట మాంత్రికుడు దేవకన్యను బలిస్తే తనకి మరిన్ని శక్తులు వస్తాయని ఇంద్రజని అపహరిస్తాడు. ఇంద్రజ అమాయకత్వానికి, స్వచ్ఛమైన ప్రేమకి ముగ్ధుడైన రాజు మహాదృష్ట నుండి ఆమెను రక్షించటంతో, ఉంగరాన్ని, స్వర్గలోక ప్రవేశాన్ని త్యజించి, మనిషిగా రాజుతోనే జీవించాలని నిర్ణయించుకోవటంతో చిత్రం సుఖాంతమౌతుంది.

ప్రత్యేకతలు

• ఈ చిత్రం విడుదలకు ముందు రాష్ట్రాన్ని వరదలు అతలాకుతలం చేశాయి. అయినా ఈ చిత్రం అఖండ విజయాన్ని నమోదు చేసుకొంది.
• శాలిని, శామిలి ఇందులో బాలతారలు. శాలిని సఖి ద్వారా కథానాయిక గా పరిచయం అయితే, శామిలి ప్రియురాలు పిలిచిందిలో చిన్న పాత్రని పోషించింది. ఓయ్ సినిమాతో కథానాయికగా పరిచయం అయింది.వారి సోదరుడు రిషికూడా బాలనటుడిగా నటించారు.

జగదేక వీరుడు అతిలోక సుందరి ఓ దృశ్య కావ్యం!

నవరస భరితమైన చిత్రాలంటే ఏమిటి? అనే ప్రశ్నకి సమాధానం... సినిమాని జనరంజకంగా నిర్మించడం అంటే ఎలా?అనే ప్రశ్నకి సమాధానం... సినిమా హిట్‌ కావడానికి తీసుకోవలసిన జాగ్రత్తలు.... ఇవన్నీ తెలుసుకోవాలంటే ‘జగదేకవీరుడు అతిలోకసుందరి’ సినిమా చూడాల్సిందే. ముఖ్యంగా సోషియో ఫాంటసీలకి రాఘవేంద్రరావు మార్కు సినిమా ఇది. చిత్రం ప్రారంభంలోనే ముద్దులొలికే బేబీ షామిలిని చిరంజీవి భుజాలపైకి ఎత్తుకొన్నప్పుడే ఈ సినిమా పిల్లలకు నచ్చే విధంగా రూపొందించినట్లు అర్థమైపోతుంది. కామెడీ ట్రాక్‌ని కథలో భాగంగా చేయడం, చిన్న విలన్ల గుంపుని ఒకేసారి కాకుండా నెమ్మదిగా ఒక్కొక్కరినీ కలుపుతూ అమ్రిష్‌ పురి లాంటి మాంత్రికుడు, మెయిన్‌ విలన్‌కి కలపడం, సీన్‌కి సీన్‌కీ లింక్‌ వేయడంలో....స్కీన్ర్‌ ప్లేకి ఒక మంచి అవగాహన వర్ధమాన దర్శకులకి కలిగించే పాఠం ఈ సినిమా. ఇక జగదేకవీరుడు అంటే చిరంజీవి చేసే సాహసాలు, ఆయన అల్లు రామలింగయ్యతో చేసే చమత్కారాలు ఇందులో చూడాల్సిందే. ఇక శ్రీదేవి నిజంగా దేవలోకం నుంచి దిగివచ్చిన దేవకన్యలా ఉంటుంది. ఆమె అచ్చమైన సంస్కృత భాషలో ‘మానవ..ఓ మానవా..’’అంటూ పిలిచే మాటలు చాలా చక్కగా ఉంటాయి. చక్కటి పాటలు, జంధ్యాల మార్కు మాటలు, ఇళయరాజా నేపధ్య సంగీతం, ఇలా అన్నీ ఏంటో అలా కుదిరిపోతాయంతే మరి! ఇప్పటి తరం పిల్లలకు వేసవి సెలవుల్లో లేదా మరో ఆదివారం ఈ సినిమా చూపండి.

ఇందులో చిరంజీవి హీరో అయినా కథ శ్రీదేవి చుట్టూ తిరుగుతూ ఉంటుంది. ఆమె పడే కష్టాల్ని తీర్చడానికి ప్రయత్నం చేస్తూ ఉండడమే చిరు పని!

సీన్ కి సీన్ కీ లింకింగ్ చాలా చక్కగా ఉంటుంది! పాప కాలు ప్రమాదవశాత్తు విరిగితే,అవసరం అయితే ఆ దేవ లోకాన్ని కిందకి దించయినా సరే పాపకి నయం చేయిస్తానని అనడం తోటే ,ఇంద్రలోకం చూపడం,కాలు విరిగితే,మూలికా వైద్యం తో అది నయం చేయవచ్చని ఓ ఋషి సూచించడం,అక్కడికి దేవకన్యలు రావడం,ఉంగరం పడిపోయి, హీరో కి చిక్కడం... ఇవన్నీ...చాలా వేగంగా చిత్రానువాదం లో ఫ్లో లో వెళ్తుంటే ఒక్కొక్క విలన్ నీ వేర్వేరు సందర్భాల్లో ఎదిరించి, వాళ్లందరికీ లింక్ వేయడం బాగుంటుంది.

ఈ సినిమా హిట్ అయ్యేందుకు నేపధ్య సంగీతం, పాటలు,మాటలు,ఇంకా చిరు,శ్రీదేవి ల పోటాపోటీ నటన, మాంత్రికుని గా అమ్రిష్ పురి, ఇతర విలన్ ల అభినయం కుదిరాయి.

సంభాషణలు

• ఇంద్రజ: మానవా!
• రాజు: నువ్వా పిలుపు మానవా?
• ఈ మానవుని చెంత చేరి, అచ్చిక బుచ్చికలాడి, మచ్చిక చేసుకొని, నా అంగుళీయకము సంపాదించెద.
• ఇంద్రజ: ఒక్క పర్యాయము నీ వామ హస్తాన్ని నా దక్షిణ హస్తానికి అందించెదవా?
• ఓరీ, వృద్ధ మానవా!

అల్లు: అమ్మా నా పేరు వృద్ధ మానవా,గడ్డ ముక్కూ గాదు!

• ఆహా ఎక్కడికో వెళ్లిపోయావు రా మాలోకం!

అవును సర్,హిమాలయాల అంచుల దాకా వెళ్ళాను సర్!

• మానవా! అధరములు మండి పోవు అగ్ని పుట్టినది!అమృతం లేదా మీ ఇంటా!

ఈ చిత్రంలోని పాటలు

ఈ చిత్రంలోని అన్ని పాటలు అత్యంత జనాదరణ పొందినవి.వీనుల విందు గా,కనులకి పసందైన విందు భోజనం గా తీర్చిదిద్దారు.

• మన భారతంలో
• అందాలలో అహో మహోదయం
• జై చిరంజీవా! జగదేకవీరా!
• యమహో నీ యమా యమా అందం
• అబ్బనీ తీయనీ దెబ్బ
• ప్రియతమా, నను పలకరించు ప్రణయమా
• ధినక్కుతా కసక్కురో

ఇవి కూడా చూడండి

చిరంజీవి నటించిన సినిమాల జాబితా